Trza rozruszać gnaty

Wiosna ostatni czasy, moga pedzieć nos rozpieszczo. Bo i człowiek z zimowych jup zarozki wskoczoł w krotki rynkow. Dni coroz dłogsze, słonko piyknie grzeje, wszyndzi coroz bardzi zielono, a ptoki wyśpiywujom całe arie. I jak nie przoć tej naszej wiośnie.

Ale nojpiykniejsze w tym wszyskim je to, że człowieka aże nosi, żeby cosik robić. A bez ta zima, człowiek trocha sie zasiedzioł. Bo i co mioł robić, jak durch wioło, loło, a słońca było ani do gorści.

Ale to już momy za sobom i terozki, to yno bydzie lepszy. Yno gnaty trocha bolom, jak tak człowiek za fest pofechtuje. Ale jak boli, to bezmałaś durch żyjymy.

A bez wiosna je co robić. O robocie nie spomna, kole chałupy, w zegrodce, yno dzisio trocha o tzw. aktywności, jak to sie terozki godo.

Ale żeby nos kusiyło, muszom tyż być warunki ku tymu. A myśla, że u nos je co robić. Bo przeca we Wodzisławiu momy 3 Wzgórza, kaj kożdy cosik może do sia znojś. Koło, rolki, wrotki i kaj yno co bądź. I psy majom swoj wybieg.

Jak zaś wto woli las, toż polecom polotać na Balatonie, abo we Studziynce w Jonkowicach.

Tym co lubiom trocha klapnyć na sztyry literki, polycom nasze radlińskie tężnie. Choć niedaleko kokosow, to luftym idzie sie tam sztachnyć.

Powiym wom, że nojważniejsze to sie ruszać na świyżym lufcie. Człowiek zapomino o problemach, a i zdrowi sie poprawio. A nasze gnaty? No coż, to tak jak z motorym. Jak nie używosz w końcu zaruści.

Pyrsk!

---

zaruści – zardzewieje

gnaty – kości

motor – silnik

fechtować – ruszać się

koło – rower