Ciynżkie tymaty

Musza Wom pedzieć, że som tematy ciynżkie na kiere roztomanci ludzie majom roztomańte zdania. A ostatnio tymatym numer jedyn je in vitro.

Powiym wom, że na nie jednym Geburstagu była haja miyndzy tymi, co som za abo przeciw.

Jo tyż mom mieszane uczucia, bo tak– wiara katolicko nakozuje, żeby być prociw. Ale tak se myśla, a jak tak wto nie umi inkaszy mieć bajtla, to zrobi wszysko żeby go mieć.

Dobrze sie godo tym, kierzi majom swoji dziecka, ale taki co by chcioł, a nie umi już inakszy bydzie sie na to dziwoł.

I co ło tym myśleć? Kożdy se musi to dobrze przekalkulować.

Ale podle mie, w demokratycznym kraju w jakim żyjymy, kożdy by musioł mieć prawo do swojigo zdanio i potympiani tych co som za abo przeciw je chyba nie na miejscu.

Myśla, że w Polsce momy do czyniynio ze skrajnościami– abo wtoś godo, że za In vitro sie idzie do piekła, abo uzaś wtoś twierdzi, że ci co nie som za, myślom jak w średniowieczu.

A mono by trza było to wszysko dobrze poukładać i byłoby blank inkaszy?

Na przikład– yno tyn by mog mieć In vitro, kiery mo zalycynia medyczne i ni mo możliwości, żeby inakszy mieć swoji dziecko. Ale w Polsce to chyba tak nie działo. Bo u nas dycki je coś czorne, abo fest białe.

Na koniec powiym yno tela, że kożdy bydzie za swoji odpowiadoł, beztoż domy se pokoj z ocynianiym inszych. Bo jak to godo porzekadło: „u cudzych widzimy belka, a u siebie ani ździebełka”.

Pyrsk.

Geburstag – urodziny

haja – kłótnia

bajtel – dziecko