Szampon i mydło woniajom już jak bombony

Najdalij wczoraj chciałach se zrobić zielono ogorka ze śmietonkom po polsku mizeria. Możno nie yno mie po ostruganiu odechciało jom sie jeść. Tak śmierdziała abo nawozym, abo jakim prochym coby wartko urosła. Wiela my tych roztomańtych polepszaczy za dziyń zjymy, wiy yno tyn co pamiynto prziniesiono z grzyndki tomata abo ogorka, kiero bez pomoganio gazym na słońcu ożdżelała. Bo to wszystko jest podganiane prochami. Kupisz konsek szynki, to na drugi dziyń ciecze z nij bajca, kierom była przed wyndzyniym napuszczano. Po tej strasznej ptasij grypie kiero my przeżywali, już ni ma szmaku na filet z kurczaka, trzabyło by przi kupowaniu fileta prosić: „Poł kila fileta ze zabitego”, bo te z tych uduszonych abo za żywca parzonych som krwawe.

Coś tam słyszymy o modyfikowanym ryżu, kiery jest niezdrowy, dyć z ryżu szło tela roztomańtego jodła naszykować. Kleik z ryżu dowało sie dzieciom i były zdrowe. Chyba trocha z lynistwa ciepli my sie na tyn 5 jajeczny makaron. Już nom szmakuje ale co tam ku tym 5 jejec dosypoł producynt to wiy yno on. Woniadła kiere som w piernikach, babkach, bombonach, pudingach wszystko chyba bierom z jednej i tej samej skrzinki. Dyć już i szampon i mydło woniajom jak bombony. Trefi sie jeszcze downiejszo mynij woniawo landrynka, ale trza mieć szczyńści żeby jom dostać.

Czytałach ostatnio, że służba zdrowia wziyna sie za roztomańte czipsy, kierymi dzieci sie trujom a kiere kupujom też we szkolnych sklepikach. Wiymy, że dużo witaminy mo pietruszka, ale najbardzij podegnany jest kalafior. Te jego kwiotki, by bezmała umiały świycić. Już wierzymy, że herbata, kiero pijymy z chlorowanej wody też jest dobro, jak sie nom trefi pić herbata z wody ze studnie godomy, że jest miynko. Trza fest dać se pozor na krałzy z gotowymi wyrobami garmażeryjnymi, np. gołombkami. Jedyn producynt poradzi dać towor dobry a drugi sprzedo taki chacharstwo, że tych twardych krup ani kury nie chcom. Godajom, że przizwyczajyni jest drugom naturom człowieka yno nikiedy nie wiadomo z czego boli nas wontroba abo żołondek, bo ich tak leko nie idzie do tej chymie przizwyczaić...

Aniela Langer
laureatka konkursu „Ślązak Roku 1996”
w 2001 r. otrzymała tytuł „Ślązaka nad Ślązakami”